E schöni Wuche

Hoi zäme!
Nachdäm mer ja letschdi Wuche sones Party-Wuchenändi hei gha u i dert einigi nätti Au Pairs troffe ha, isch d'Party i dere Wuche grad witergange ;)
I ha uf dene AuPair Parties e nätti Dänin kenneglehrt, wo leider nume für churzi Zyt in Houston isch, wüu si eigetlech ds Florida läbt.
S'isch aber mega cool, dass mer üs glich hennä guet verstöh! So si mer zum Bischbiu am Mittwuch zäme mit 2angerne Au Pairs uf de Miller Hill gange, das isch es OpenAir-Chino, wo der Itritt nüt choschded! Dert isch (passend zu Halloween) Hitchcocks "Psycho" gloufe!
Mir hei üs auso e gmüetleche Abe gmacht u hei unger angerem ou d'Ussicht uf d' Skyline vo Houston gnosse!

Ob drs gloubet, oder nid, am Fritig morge sid Josephine (äbe das Meitschi us Dänemark) u i öppe 7 Kilometer um e Uni jogget! S' het hennä gfägt, o wes ordetlech Überwindig choschdet het, um haubi 7 am Morge los z'loufe =D

Trotz au däm Spaß ischs e herti Wuche gsi!
D'Bébe si beidi am Zahne, dh si gränne viu u hei immer wieder Durchfau. Clara het di Wuche o grännet: wüu i se nid mit em Outo abghout ha, sondern mir di 7minute hei glüffe si!
Auerdings hei mer für e Fritig Abe e Movie-Night planet gha, drum si mer am Donschdi id Bibliothek gange u hei üs Fiume u Büecher usgleihnet.
Wo mer üs später so nes Büechli aglueget hei, ha ni re gseit: "Weisch, dass i di mega feschd liäb ha?" Clara: "Ja, aber i ha di no me lieb!" <3
Jöö, hennä härzig gsi u das entschädigt när o geng für di chline stressige Sache, wo äbe immer wieder mau vorchöme!

I versueche mire Gaschdfamilie ou geng chli d'Schwiizerkultur necher z'bringe, drum hets am letschde Sunntig säubschd gmachti Chnöpfli gäh =)
Es si leider Vouchornchnöpfli worde (liege extremschd schwär im Mage!), aber de gits se de haut no es zwöits Mau ir richtige Form ;)
Geschder hani Züri Gschnätzlets gmacht, das isch richtig guet acho!
We dr auso no Vorschläg heit für feini Schwiizer Gricht - si wärdi geng gärn agno!

Hüt am Nami fröii mi scho uf es Skypedate mit nere liäbe Fründin u hüt am Abe gö Josephine u ig no i "Cloud Atlas". Wird sicher luschdig! =D

I fröie mi geng o vo öich mau z`ghöre,
häbets guet u gniesset dr Herbschd!

Liäbi Grüäss,
öii Sarah <3

PS: Das war Berndeutsch - eine Hommage an meine 2.Heimat =D